Tag: могилев

Магілёвец за 11 гадоў скраў амаль паўмільёна рублёў у сяброў і родных

Навіна ад

31-гадовы магілёвец 11 гадоў прасіў грошы ў сяброў і родных, падмануўшы іх на больш чым 474 тыс. рублёў.

Пачынаючы з 20-гадовага ўзросту малады чалавек больш чым 180 разоў браў грошы ў даверлівых людзей. Усяго на яго расповяды аб інвестыцыях у мядовы бізнес папаліся 19 жыхароў Магілёва і Мінска, сцвярджаюць у пракуратуры.

Бізнес нібыта прагарэў, а вяртаць пазыкі магілёвец не спяшаўся, а потым і ўвогуле перастаў выходзіць на сувязь са сваімі крэдыторамі.

Таксама ён прыдумываў і іншыя прычыны для выпрошвання грошай – рамонт аўтамабіля, навучанне, закрыццё старых даўгоў, неабходнасць набыцця лекаў. Адметна, што махляра не спыняў і паважаны ўзрост некаторых родных, якія спансіравалі яго на працягу доўгага перыяду. Так, адну з пенсіянерак ён падмануў ажно больш за 100 разоў за восем гадоў.

Увогуле суммы пазык вагаліся ад 20 рублёў да 17 тыс. долараў.

Потым, як сведчыць пракуратура, малады чалавек кампенсаваў урон пацярпелым, але толькі на 53 тыс. рублёў.

Справа аб махлярстве ў асабліва буйным памеры перададзена ў суд. Малады чалавек знаходзіцца пад вартай.

Фотаздымак з адкрытых крыніц

У Магілёў прывезлі два вагоны са стралковымі патронамі з Расіі

Навіна ад

З расійскага Барнаула ў Магілёў за мінулыя месяцы прывезлі два вагоны з патронамі. Пра гэта даведалася Супольнасць жыгуначнікаў Беларусі.

Паводле чыгуначнікаў, раней публічна не праходзіла інфармацыя аб тым, што за перыяд з красавіка па верасень 2025 года з Барнаульскага патроннага завода на станцыю Магілёў-ІІ (Магілёўскае аддзяленне БЧ) у адрас Дэпартамента фінансаў і тылу МУС Рэспублікі Беларусь было адпраўлена два крытых вагоны з грузам “Выбуховыя матэрыялы” (патроны для стралковай зброі).

Як адзначае Супольнасць, паміж Беларуссю і Расіяй існуе фіксаваны двухбаковы абмен боепрыпасамі. Пра месца іх дастаўкі – станцыю Магілёў-ІІ раней грамадскасці вядома не было.

Даведка: акцыянернае таварыства “Барнаульскі патронны завод” – адзін з найбуйнейшых вытворцаў боепрыпасаў у Расіі, які спецыялізуецца на выпуску патронаў для стралковай зброі ваенна-прамысловага і грамадзянскага прызначэння. Прадпрыемства вырабляе шырокі спектр боепрыпасаў да аўтаматаў, кулямётаў, вінтовак і пісталетаў, уключаючы вайсковыя калібры 5,45×39, 7,62×39 і 7,62×54r, а таксама паляўнічыя і спартыўныя патроны. Завод з’яўляецца рэгулярным пастаўшчыком прадукцыі для Міністэрства абароны РФ, сілавых структур і дзяржаўных заказчыкаў, уваходзіць у лік ключавых прадпрыемстваў Расійскай патроннай галіны.

Фотаздымак: Супольнасць чыгуначнікаў Беларусі

Суд у Магілёве абвясціў экстрэмісцкім TikTok Аляксандра Івуліна

Навіна ад

Суд Ленінскага раёна Магілёва назваў экстрэмісцкім TikTok-акаўнт «ЧестнОК-LIVE» спартыўнага журналіста, экс-палітвязня Аляксандра Івуліна.

Гэты рэсурс ужо ўнеслі ў так званы Рэспубліканскі спіс экстрэмісцкіх матэрыялаў. 

Аляксандр Івулін – ураджэнец Оршы, вядомы спартыўны журналіст і футбаліст. Ён гуляў за “Крумкачоў”, працаваў у выданні Tribuna.com. 3 чэрвеня 2021 года Аляксандр быў арыштаваны спачатку на 30 сутак па адміністрацыйнай справе, а пазней асуджаны на два гады калоніі па артыкуле 342 Крымінальнага кодэксу (групавыя дзеянні, якія груба парушаюць грамадскі парадак). Пасля выхаду з калоніі Івулін з’ехаў за мяжу і аднавіў працу над уласнымі праектамі. 

Яго праект “ЧестнОК” у красавіку гэтага года быў прызнаны “экстрэмісцкім фарміраваннем”.

Фотаздымак: “Наша ніва”

Унікальны малюнак Магілёва ХІХ стагоддзя быў прададзены на маскоўскім аўкцыёне

Навіна ад

Стала вядома пра продаж на аўкцыёне “Літфонд” у Маскве арыгінальнага малюнка з відам Магілёва 1822 года. Навіной пра гэта падзяліўся вядомы магілёўскі калекцыянер і краязнавец Алег Давід Лісоўскі.

Упершыню гэты акварэльны малюнак стаў вядомы восем гадоў таму, калі ён з’явіўся на адным з амерыканскіх аўкцыёнаў. “Акварэль была ўнікальная сваім ракурсам, які дапамог удакладніць канфігурацыю замкавых умацаванняў.” – адзначае Лісоўскі. На малюнку на пярэднім плане выяўлены спуск з Замкавай гары ў тым месцы, дзе зараз знаходзяцца прыступкі бакавога спуска з парка Горкага да Быхаўскага рынку. Выяўлены на акварэлі вал дэманструе рэальныя памеры і структуру старажытнага магілёўскага замка ў гэтым месцы.

Акварэль невядомага мастака “Від горада Магілёва” была прададзеная 9 кастрычніка 2025 года ў аўкцыённым доме “Літфонд”. Канчатковы кошт пакупкі не паведамляецца на афіцыйным сайце, але крыніцы mogilev.media са спасылкай на афіцыйных прадстаўнікоў аўкцыённага дома адзначаюць, што кошт малюнка аказаўся параўнальна невысокім для падобнай унікальнай выявы – усяго некалькі соцень еўра ў эквіваленце.

Магіляўчанку не выратаваў ад даўгоў шлюбны дагавор

Навіна ад

Магіляўчанка спрабавала пазбегнуць выплаты 240 тыс. рублёў па судоваму выраку, прыкрыўшыся шлюбнай дамовай, але пракуратура выкрыла яго фіктыўнасць.

У свой час суд у Мінску прызнаў жыхарку Магілёва вітнаватай у нясплаце мытных плацяжоў, падаткаў і іншых збораў, а таксама ў незаконным заняцці прадпрымальніцкай дзейнасцю. З яе і яе падзельнікаў было спагнана агулам 240 тыс. рублёў.

Аднак, калі на аўтамабіцль жанчыны судовыя выканаўцы наклалі арышт, жанчына хуценька разам з мужам заключылі шлюбны дагавор. Дакумент прадугледжваў, што з моманту яго заключэння ўся маёмасць жонкі пераходзіць ва ўласнасць мужа. Пры тым, што сужонцы вялі агульную гаспадарку і жанчына таксама мела прыбатак у выглядзе заробку.

Пракуратура выкрыла хітрыкі гэтых магілёўцаў і звярнулася ў суд, каб прызнаць шлюбную дамову несапраўднай. Суд Ленінскага раёна Магілёва пагадзіўся з такім меркаваннем. Яго рашэнне ўжо ўступіла ў законную сілу.

Фотаздымак з адкрытых крыніц

Будынак псіхбальніцы з жудаснай гісторыяй прадаюць у Магілёве

Навіна ад

Будынак лабараторыі Магілёўскай псіхіятрычнай бальніцы, дзе былі расстраляны каля тысячы чалавек, выстаўлены на аўкцыён.

Пабудова знаходзіцца на вул. Сурганава, 53. Цяпер гэта пустуючы аднапавярховы будынак, які пабудавалі ў 1804 годзе. 

Аб’ект знаходзіцца пад статусам гісторыка-культурнай каштоўнасці трэцяй катэгорыі «будынак пачатак XIX стагоддзя». У перыяд нямецка-савецкай вайны фашысты знішчылі ў яго сценах звыш 1200 хворых.

Варта адзначыць, што падчас вайны большасць будынкаў бальніцы было разбурана, але пасля 1945 года яе працу аднавілі. У 2009 годзе на адным з карпусоў бальніцы з’явіўся памятны знак ахвярам фашызму.

Пачатковы кошт лота – 481 243 рублі. Падаць заяўку на ўдзел у аўкцыёне можна да 18 снежня. Таргі пройдуць на пляцоўцы «БУТБ-маёмасць» 22 снежня 2025 года.

Фотаздымак: БУТБ-маёмасць

Магілёўская тынкоўшчыца даверылася кіраўніцтву і атрымала вымову

Навіна ад

Работніца адной з будаўнічых арганізацый Магілёўшчыны па вуснай згодзе з кіраўніцтвам сыходзіла з працы раней, і за гэта тое ж самае кіраўніцтва вынесла ёй вымову.

Жанчына, якая працуе маляром-тынкоўшчыкам, спасылаючыся на сямейныя абставіны, вусна дамовілася з кіраўніцтвам аб карэкціроўцы графіка: яна стала заканчваць працу ў 17:00 замест звычайных 17:30. Аднак з часам адсутнасць на працоўным месцы пасля 17:00 скончылася для яе вымоваю. Пра гэта піша сайт Магілёўскага абласнога аб’яднання прафсаюзаў.

“То бок, наймальнік спачатку загадзіўся, што я сыходжу ў 17.00, а потым вынес мне вымову за адсутнась на працоўным месцы” – распавяла тынкоўшчыца, якая звярнулася ў праўладны прафсаюз па дапамогу ў такой несправядлівасці.

У прафсаюзе патлумачылі, што такія змены, калі няма жадання трапляць пад дысцыплінарнае спагнанне, трэба рабіць на паперы, то бок праз загад па арганізацыі, падаўшчы адпаведную заяву. Такую паперу прававы прафсаюзны інспектар дапамог скласці, і працоўны графік жанчыны быў зменены. Цяпер яна мае менш часу на абед і сыходзіць з працы на паўгадзіны раней. Вымову ёй ніхто не адмяніў.

Фотаздымак: mogilev.1prof.by

Магілёўская пракуратура заблакавала сайт з беларускімі кнігамі

Навіна ад

Па пастанове пракурора Магілёўскай вобласці заблакаваны сайт “Kirma.sh: Беларускія кнігі з дастаўкай па свеце”.

Як паведамляе БелТА са спасылкай на абласную пракуратуру, на сайце знаходзіліся кніга “Айчына: Маляўнічая гісторыя” (аўтар У. Арлоў) і навукова-папулярнае друкаванае выданне “Горкія гады: трагедыя Заходняй Беларусі 1944-1954” (аўтар А. Татарэнка). Гэтыя выданні прызнаныя так званымі экстрэмісцкімі матэрыяламі і ўключаны ў адпаведны рэспубліканскі спіс.

Акрамя таго, на інтэрнэт-рэсурсе таксама ажыццяўлялася рэалізацыя кнігі “Патаемная спадчына. Казкі пра беларускіх жанчын”, выдадзенай ініцыятывай ByProsvet. У 2022 годзе рашэннем Міністэрства ўнутраных спраў яна прызнана “экстрэмісцкім фарміраваннем”.

Сайт Kirma.sh створаны камандай беларускіх валанцёраў, якія шануюць і падтрымліваюць усімі магчымымі спосабамі беларускую культуру і мову.

“Мы жывем у Польшчы і пачынаем свой шлях адсюль, але штодня імкнемся развівацца, пашыраючы асартымент і функцыянал нашай крамы, удасканальваючы кожны этап працы – як з пакупнікамі, так і з вытворцамі. Мы называем нашу пляцоўку “кавалачкам беларускай душы”, бо шчыра верым, што сабралі тут усё самае лепшае, добрае і душэўнае, што адлюстроўвае беларускую культуру” – гаворыцца на сайце інтэрнэт-магазіна.

Фотаздымак: Kirma.sh

Магілёўскія ліфты не “бачаць” малых дзяцей, прыходзіцца класці ў іх цэглу

Навіна ад

Прадукцыя “Магілёўліфтмаша” можа не толькі перавозіць людзей з паверха на паверх, але і стымулюе развіццё кемлівасці з самага дзяцінства.

Тэлеграм-канал “Могилев. Главное!” падзяліўся гісторыяй здзіўлення дзяўчыны, якая пасля адкрыцця створак выкліканага ліфта ўбачыла ў ім дзве цагліны. “Навалили кирпичей” – з непрыхаванай непрыязнасцю да невядомых, якія засмецілі ліфт, выказалася яна.

Аднак, як распавялі мясцовыя жыхары, цагліны там знаходзіліся не па чыімсьці глупым жарце, а выконвалі важную функцыю. “Без цэглы дзеці не могуць паехаць. Ліфт проста не бачыць маленькую вагу і не рухаецца!” – патлумачылі дасведчаныя людзі.

Паколькі ў жылых дамах Магілёва ніякіх іншых ліфтоў, акрамя вырабленых на заводзе “Магілёўліфтмаш” проста быць не можа, бо ён, як адно з найбуйнейшых прадпрыемстваў горада, не дапусціць сюды ніякіх канкурэнтаў, то вызначыць вытворцу такой цудоўнай прадукцыі праблемы не складае. 

Здаецца, горшай антырэкламы, чым тая, што прадстаўлена на здымку, для вырабаў магілёўскіх ліфтабудаўнікоў знайсці цяжка. Можна толькі паспрабаваць знайсці тлумачэнне, чаму ліфты “Магілёўліфтмаша” не “бачаць” малых дзяцей. Магчыма, такім чынам спрабуюць перашкодзіць дзецям катацца на ліфтах? Дык з цэглай лёгка абыйсці такую перашкоду. 

Такім чынам, каб праехаць у магілёўскім ліфце недастаткова націснуць кнопку – трэба яшчэ мець адпаведную (якую?) вагу. Як калісьці казалі – тэхніка на мяжы фантастыкі.

Фотаздымак: ТГ  “Могилев. Главное!”

Адкрыліся чартарныя авіярэйсы Магілёў – Шарм-эль-Шэйх

Навіна ад

З магілёўскага аэрапорта сёння выляцеў самалёт з турыстамі ў егіпетскі Шарм-эль-Шэйх.

Як паведамляе тэлеграм-канал Minsk Airport, чартарны напрамак адкрылі авіякампанія Belavia сумесна з тураператарам «Інтэрсіті». Першы рэйс адпраўлялі з вялікай помпай, бо падзея для правінцыйнага аэрапорта, сапраўды, вялікая.

“Тэматычная фотазона, пачастункі для пасажыраў, музычнае суправаджэнне, святочны торт, памятныя падарункі ад аэрапорта і авіякампаніі першым зарэгістраваным пасажырам, прадчуванне незабыўнага адпачынку, шчырыя эмоцыі і цёплыя ўсмешкі! Такім быў аэрапорт Магілёў сёння”, – гаворыцца ў паведамленні.

Палёты планіуецца ажыццяўляць адзін раз на 10-11 дзён на самалёце Boeing 737-800.

Апошні раз самалёты з Магілёва ў Шарм-эль-Шейх лёталі больш за чатыры гады таму, піша БелТА.

Фотаздымак: ТГ Minsk Airport