Па звестках сайту магілёўскай улады днямі ў гарадскім парку Падміколле адбылася высадка бэзу. Распіяраная акцыя завершылася пасадкай ажна 30 кусцікаў у куточку “Сад памяці”. Пры гэтым, прыўладныя актывісты вызначыліся, бо здолелі закапаць сцяг Леніна побач з калгасніцай і правесці БЧБ пікет.
Днямі, калі верыць афіцыйнаму сайту гарвыканкама, у Падміколлі адбылася восеньская пасадка дэкаратыўнага кустоўя. Руцінная справа, але мы заўжды вітаем такую актыўнасць нават з боку арганізацый з неадназначнай рэпутацыяй. Вось толькі чамусьці напачатку сум, а потым усмешку выклікала гэтае паведамленне.
У парку сабралася цэлых 14 прадстаўнікоў такіх моцных арганізацый, як БРСМ, студактыў Беларуска-Расійскага ўніверсітэта, прадстаўнікі СКО «Спадчына», а яшчэ госці са смаленскага абкама грамадскага аб’яднання «Расейскі саюз моладзі» і прадстаўнікі адміністрацыі горада. І што ж яны здзейснілі, каб патрапіць у галоўную стужку гарадскіх навін? Што ж нарабілі ў сярэднім 2,8 прадстаўніка 5 такіх паважаных арганізацый? Яны пафатаграфаваліся, пагрэліся на восеньскім сонейку і высадзілі 30 кустоў бэзу. Ну недзе так атрымалася – па два кусціка на нос. Смех і грэх!
Мой сябра вакол свайго дому на Саломенцы адзін высадзіў разы ў тры болей дрэў і кустоў, чым гэтыя 14 актывістаў. Так сябра жа не толькі пасадзіў, але яшчэ і вырасціў сваіх гадаванцаў, для чаго іх даглядаў, паліваў некалькі гадоў. Пра яго штогадовыя акцыі ніхто не напісаў. А тутака рабяты амаль у парадным адзенні гадзінку патусаваліся і… – адразу трапілі ў стужку на самае пачэснае месца.
Дарэчы, адзін з небаракаў, магчыма расіянін, бо не ведае нашых парадкаў, здзейсніў, хочацца верыць не наўмысна, правапарушэнне, бо прыйшоў на акцыю ў белай кашулі з чырвоным гальштукам! Добра, што не знайшлося “неабыякавых грамадзян”, якія ж маглі куды трэба і патэлефанаваць! Але, дзякуй Богу, абышлося. У наступныя разы, трэба арганізатарам праводзіць ідэалагічную работу з удзельнікамі акцый больш старанна і тлумачыць, што можна, а чаго нельга апранаць на публічных мерапрыемствах.
А яшчэ хочацца падтрымаць думку старшыні савета СКО «Спадчына» Віталя Арцёмчыка, які з сумам канстатуючы малалюднасць акцыі, выказаў пажаданне, каб у наступным годзе да акцыі падключылася як мага больш арганізацый, грамадскіх аб’яднанняў і магілёўцаў. І праўда, хочаце правесці ГАРАДСКУЮ акцыю, ну хаця б парупцеся сабраць людзей і арганізаваць для іх фронт работы.
І ўсё ж, за актыўнасць прыўладных актывістаў можна парадавацца. Хай бы яны ўвесь час займаліся чым-небудзь карысным. Таксама радуюць і выклікаюць настальгічную ўсмешку назвы гатункаў кустоў бэзу, якія садзілі прыўладныя актывісты. Яны напэўна прыкалоцца жадалі?” Калі чытаць літаральна, то выходзіць, што актывісты такіх паважаных арганізацый прыкапалі “Сцяг Леніна” побач з “Калгасніцай” захоўваючы “Надзею”, што вырасце “Памяць Вавілава”, і гэта, кажу я вам, – “Сенсацыя”.
І мілая вішанка на торце – толькі назву гатунку “Сцяг Леніна” зафіксавалі арганізатары пры пасадцы, а дзе “Калгасніца”, дзе “Надзея” і “Сенсацыя”, дзе “Памяці Вавілава” магілёўцы павінны здагадвацца самі.
Тася Лемон