У відэазвароце да ўладаў можна пабачыць вядомых творцаў нашай краіны. Напрыклад, шчырыя словы пра сітуацыю ў Беларусі кажуць Ганна Янкута, вядомая аўтарка кніг пра ката Шпрота; Вера Бурлак, аўтарка кнігі “Дзеці і здані”, перакладчыца Льюіса Кэрала (“Скрозь люстэрка і што ўбачыла там Аліса”). Абедзве спадарыні з’яўляюцца кандыдатамі філалагічных навук, лаўрэаткамі аўтарытэтных літаратурных прэмій.
У баку не засталіся Надзея Ясмінска (мае ў сваёй бібліаграфіі 15 дзіцячых кніг і 3 п’есы), Наталка Харытанюк, якая напісала “Казкі старога Адамкава”, Надзея Кандрусевіч-Шыдлоўская – перакладчыца з італьянскай, ангельскай і шведскай моў (напрыклад, вядомых шведскіх дзіцячых аўтараў Свэна Нурдквіста, Юі і Томаса Вісландэраў ды іншых).
Пералічваць дасягненні і статусы можна цэлымі старонкамі, але самі імёны ўдзельнікаў акцыі вартыя павагі і галоўнае – увагі, у сувязі з выказанай імі пазіцыяй: Дыяна Балыка, Вольга Акуліч, Яўгенія Пастэрнак, Андрэй Жвалеўскі, Марыя Мартысевіч.
Таксама далучыліся дзіцячыя пісьменнікі, якія не мелі магчымасці патрапіць на студыйную відэасесію: Андрэй Хадановіч, Марыя Бершадская, Юры Несцярэнка, Ганна Зянькова, Алег Грушэцкі.
Нагадаем, што наш зямляк Юры Несцярэнка выдаў у 2020 годзе ў выдавецтве “Каўчэг” дзіцячую кнігу “Чароўныя назвы”. Таксама Юры друкаваўся ў рэспубліканскіх выданнях для дзяцей і падлеткаў “Вясёлка”, “Бярозка” ды ў іншых абласных і раённых выданнях.
Такім чынам зразумела, што творцы, якія пішуць для падрастаючага пакалення вельмі заклапочаны маральнымі і этычнымі праблемамі, якія зараз узнікаюць у грамадстве.
“Дзеці не толькі вераць у казачныя гісторыі, але і называюць саміх пісьменнікаў чараўнікамі. Гэта кранальная, вельмі дарагая для нас вера. І мы гатовыя змагацца са злом, гвалтам, беззаконнем, хоць у жыцці ў нас і няма чароўных палачак…”
Алесь Рудакоў