У сацсетках зьявілася інфармацыя пра ўспышку каранавірусу ў бабруйскім садку № 73. Загадчыца садку кажа, што санітарна-эпідэміялягічная абстаноўка пад кантролем і ўстанова працуе ў звычайным рэжыме, паведамляе Радыё Свабода.
Паводле загадчыцы Ірыны Прохаравай, за апошні месяц на каранавірус у садку перахварэлі 8 супрацоўнікаў — цяпер яны зноў працуюць. Яшчэ чацьвёра на бальнічных.
24 чэрвеня ў аднаго дзіцяці пацьвердзілі каранавірус — ягоную групу з шасьці дзяцей разам з памочніцай выхавацелькі ізалююць. Усяго ў садку 62 супрацоўнікі.
Загадчыца: «Нам самім гэтая сытуацыя не падабаецца…»
Ірына Прохарава кажа, што разумее ўвагу да садку, бо ён стаў першым у горадзе, дзе выявілі каранавірусную інфэкцыю і «нямала супрацоўнікаў як кантакты 1 узроўню пабывалі ў ізаляцыі».
«Нам самім гэта ўсё дужа непрыемна, — кажа Ірына Прохарава. — Мы зусім ня хочам, каб нашы дзеткі хварэлі. Бацькоў па неабходнасьці просім прытрымаць дзяцей пакуль дома. Цяпер па горадзе абвешчаны масачны рэжым і на прадпрыемствах, — не таямніца, што людзі хварэюць».
У Бабруйску з 19 чэрвеня ўвялі масачны рэжым
Гэта вынікае з пляну прафіляктыкі, апублікаваным 19 чэрвеня.
Людзі павінны карыстацца маскамі ці рэсьпіратарамі ў арганізацыях і ўстановах, дзе немагчыма забясьпечыць сацыяльнае дыстанцыяваньне;
У крамах нельга дапускаць вялікай колькасьці наведнікаў адначасова;
Касіркам і прадаўцам трэба паставіць празрыстыя экраны або забясьпечыць гэтых працаўнікоў засьцерагальнымі шчыткамі.
19 чэрвеня ў мясцовай газэце «Трыбуна працы» галоўны дзяржаўны санітарны ўрач Бабруйску і раёну Дзьмітры Райтэр патлумачыў прычыну новаўвядзеньняў. Паводле яго, у горадзе штодня рэгіструюцца выпадкі заражэньня каранавірусам, і сярод хворых найбольш людзей працаздольнага веку — ад 30 да 60 гадоў. Колькі выяўлена выпадкаў COVID-19 у Бабруйску, ён не сказаў.
Апошні раз афіцыйную колькасьць выяўленых хворых з каранавірусам у Магілёўскай вобласьці называлі 24 красавіка.
На Магілёўшчыне абавязковы масачны рэжым таксама ўвялі ў Кіраўскім і Бялыніцкім раёнах.