10 красавіка 1942 года каля дзвюх тысяч жыхароў Магілёва загінула ў вадзе выйшаўшай з берагоў Дубравенкі. Памяць аб той трагедыі сёння амаль знікла. Уваскрасіць яе могуць толькі задакументаваныя ўспаміны сведкаў, рэдкія фотаздымкі і праца гісторыкаў.
Жыццё Магілёва, які з лета 1941 года апынуўся пад нямецка-фашысцкай акупацыцяй, працягвалася. Праўда, не для ўсіх яго жыхароў. Так, каля 15 тысяч магілёўскіх яўрэяў былі сагнаныя ў гета і да восені таго года іх забілі новыя гаспадары заваяванай тэрыторыі.
Але ў хуткім часе смерць спасцігла і іншых магілёўцаў, якія ўвесну 1942 года жылі ці знаходзіліся на берагах невялікай рэчкі Дубравенкі. Яны загінулі ў яе водах, якія, змыўшы чыгуначны насып, як цунамі паглынулі больш за сотню дамоў, што трапіліся на іх шляху.
Намаганнямі гісторыкаў, краязнаўцаў і звычайных аматараў вывучэння мінуўшчыны родных мясцін удалося высвятліць тое, што замоўчвала савецкая гістарычная навука, якая перш за ўсё абслугоўвала камуністычную ідэалогію. Дакументы, фотаздымкі і ўспаміны, што выкарыстаны ў новай перадачы «Погляд у мінулае» з удзелам гісторыка Ігара Пушкіна на 6tv.by, дазваляюць скласці ўяўленне аб трагічных падзеях, што мелі месца ў акупаваным Магілёве.
Здымкі тых падзеі «Магілёўскаму рэгіёну» ласкава прадставіў Давід Алег Лісоўскі – магілёвец, якія зараз жыве ў Германіі.
Уладзімір Лапцэвіч