Галоўная » День белорусской письменности

День белорусской письменности

Да Дня беларускага пісьменства ў Бялынічах (Лыжка дзёгцю ў бочку мёду ад бялыніцкага чынавенства)

Да тэмы падрыхтоўкі горада Бялынічы да Дня беларускага пісьменства “Магілёўскі рэгіён” звяртаўся на працягу апошняга года шмат разоў. Разнастайнасць тэматыкі публікацый вызывае вялікі інтарэс чытачоў, асабліва жыхароў Бялыніччыны, выхадцаў з гэтых мясцінаў. Мясцовыя ўлады вымушаны былі рэагаваць на публікацыі, каб выправіць шматлікія недахопы ў планаванні падрыхтоўкі горада.

Да Дня беларускага пісьменства ў Бялынічах застаецца роўна адзін месяц.

Рыхтуючыся да Сьвята, горад, можна сказаць, ператварыўся ў адзіную будаўнічую пляцоўку.

Будоўля нагадвае вялічэзны мурашнік, дзе, як можа падацца, вельмі зашмат хаатычнасці і неарганізаванасці. Але, прыгледзеўшыся, мы бачым, што кожны працаўнік робіць вызначаную яму справу, якая ў агульнай капілцы складваецца ў рэалізацыю задуманных планаў па падрыхтоўцы горада да Свята. І можна з упэўненасцю сказаць, што будаўнікі і камунальныя службы справяцца з пастаўленай перад  імі задачай.

Ужо амаль гатовы для ўвода ў эксплуатацыю Мастацкі музей імя Бялыніцкага-Бірулі. Заканчваюцца работы па добраўпарадкаванні цэнтральнай вуліцы горада.

Нават, помнік Леніна прыбраны з цэнтральнай плошчы каля будынка райвыканкама і перанесены ў менш значнае месца.

Але, як ужо было і раней, не могуць бялыніцкія чыноўнікі да канца ўцяміць, што яны рыхтуюць горад менавіта да Вялікага Беларускага Свята – Дня беларускага пісьменства.

Як не могуць уцяміць да гэтай пары, што Рэспубліка Беларусь – гэта незалежная дзяржава са сваёй сталіцай – г. Мінскам, і больш не падпарадкоўваецца Маскве.

Бо якім чынам можна ацаніць аздабленне новага прыгожага павільёна Белсаюздруку, размешчанага каля Раённага цэнтра культуры, на рускай мове ?

Сярод усяго іншага хараства, што робяць будаўнікі, камунальныя службы па падрыхтоўцы горада, такое аздабленне павільёна выглядае як “лыжка дзёгцю ў бочцы мёда”.

Складваецца ўражанне, што бялыніцкія чыноўнікі, седзячы ў сваіх кабінетах райвыканкама, не бываюць на суседніх вуліцах горад, дзе размешчаны іншыя шапікі гэтай установы.

Да Свята застаецца роўна адзін месяц. Часу для выпраўлення хібаў яшчэ дастаткова. Таму, наперад, за працу. Адарвіцеся, нарэшце, ад сваіх мягкіх крэслаў у кабінетах.

І можаце не спадзявацца. Беларусь і пасля 9-га жніўня 2020 года застанецца незалежнай краінай.

Рыгор Кастусёў

 

Маразм мацнее? Бялыніцкія чыноўнікі да Дня беларускага пісьменства зробяць надпіс на музеі на рускай мове

У Бялынічах надпіс на рэканструюемым да XXVII Дня беларускага пісьменства раённым музеі плануецца зрабіць на рускай мове. Прадастаўленае райвыканкамам фота праекта з выглядам музея пасля рэканструкцыі апублікавала газета “Зара над Друццю”.

На своеасаблівае “ноў-хаў” бялыніцкіх чыноўнікаў звянуў увагу журналіст “Магілёўскага рэгіёну” Барыс Вырвіч. Ён звязаўся з галоўным рэдактарам “Зары над Друццю” Міхасем Карпечанкам. М.Карпечанка адказаў, што нічога не ведае пра ініцыятыву чыноўнікаў, але пацвердзіў, што фота ў газету было прадастаўлена Бялыніцкім райвыканкамам.

Так выглядаў музей у Бялынічах да рэканструкцыі

13 сакавіка Б.Вырвіч накіраваў электронны зварот на імя старшыні Бялыніцкага райвыканкама Васілія Захаранкі. У звароце журналіст папрасіў галоўнага бялыніцкага начальніка патлумачыць, хто быў ініцыятарам такога “мастацкага аздаблення” раённага мастацкага музея імя В.К. Бялыніцкага-Бірулі, назваўшы канкрэтныя прозвішчы. Таксама Вырвіч прапанаваў В.Захаранка перагледзець гэта “бязглуздае і недарэчнае рашэнне, унесці адпаведныя змены ў праект”.

“Мне асабіста абсалютна незразумела, які разумнік з узначальваемага Вамі райвыканкама дадумаўся прапанаваць на будынку, у якім адбываецца рэканструкцыя менавіта да XXVII Дня беларускага пісьменства, зрабіць рускамоўны надпіс. Большай непавагі да роднай мовы, да шматгадовай гісторыі Бялыніцкай зямлі ўявіць цяжка.

На вялікі жаль, складваецца ўражанне, што ў Бялыніцкім райвыканкаме працуюць манкурты, якія не паважаюць ні свой народ, ні яго духоўныя каштоўнасці”, – напісаў журналіст у звароце.

Зараз будынак музея амаль цалкам зруйнаваны, на яго месцы будуецца фактычна новы, больш сучасны і тэхналагічны.

Так ён выглядае зараз

У межах падрыхтоўкі да Дня беларускага пісьменства ў Бялынічах разгарнулася маштабная рэканструкцыя. У прыватных гутарках і ў сацсетках бялынічане адзначаюць, што сродкі выдаткоўваюцца нерацыяльна, – рэканструкцыя праводзіцца на вуліцах Мічурына і Савецкай, якія і так знаходзяцца ў добрым стане. У гэты ж час нават у цэнтры горада ёсць вуліцы без асфальтавага пакрыцця.

Таксама бялынічане кажуць пра тое, што шмат добрых будаўнічых матэрыялаў з разбураемых аб’ектаў папросту “расцягваюцца”.

XXVІІ Дзень беларускага пісьменства пройдзе у Бялынічах у першую нядзелю верасня 2020 года. Вялікія змены чакаюць цэнтр горада. Вуліцы Савецкая і Мічурына, парк Ліпавы гай, гарадскі стадыён, раённы мастацкі музей імя В.К. Бялыніцкага-Бірулі будуць значна рэканструяваны. У музеі будзе захоўвацца фрагмент фрэскі з Бялыніцкага манастыра. Рамонт з элементамі мадэрнізацыі чакае многія сацыяльныя аб’екты горада і жылыя дамы.

Ірына Беганкіна