«Я быў дома з сям’ёй і сябрам, а мяне судзяць, як удзельніка сустрэчы аўтадому «Краіны для жыцця», – абураецца жыхар Магілёва Ігар Шчамялёў.
Увесь вечар 5 траўня Ігар Шчамялёў правёў дома ў другім раёне гораду – цвердзіць мужчына, таму на сустрэчы з блогерамі на Віцебскім праспекце – не прысутнічаў. На Ігара Шчамялёва склалі пратакол адміністрацыйнага правапарушэння паводле артыкулу 23.34 КаАП, за які прадугледжанае пакаранне ў выглядзе штрафу ці содняў.
«Я жыву на вуліцы 30 год Перамогі. Пра тое, што ў Магілёве 5 траўня адбыўся інцыдэнт на праспекце Віцебскім, даведаўся позна ўвечары з інтэрнэту. Першы раз міліцыянты прыйшлі да мяне 7 траўня, забралі ў РАУС на размову, пратрымалі там 2 гадзіны і адпусцілі са словамі «Мы выбачаемся, прынялі вас за парушальніка».
На наступны дзень 8 траўня прыйшлі ўжо іншыя супрацоўнікі РАУС і забралі мяне зноўку. Я паехаў на сваёй машыне, бо быў упэўнены, што гэта памылка. Але там мяне адразу пачалі пакаваць на суткі.
«Даставай шнуркі і паехалі. Патлумачыць сваю пазіцыю мне нават не далі», – кажа Ігар Шчамялёў.
Трое содняў Ігар правёў у ІВС, а 11 траўня яго прывезлі ў суд Кастрычніцкага раёну Магілёва. У якасці сведкі Ігар запрасіў свайго сябра, які 5 траўня быў у яго ў гасцях. Пасля сведчанняў сябра суддзя Жанна Пушкіна адклала разгляд справы да 14 траўня.
«Яшчэ было дзіўна, што адразу пасля той акцыі мне пачалі пісаць у тэлеграм невядомыя людзі. Яны запытваліся, ці быў я на той сустрэчы, ці не, дасылалі мне фотаздымкі адтуль. Я адказваў агульнымі фразамі, бо адразу зразумеў, што гэта нейкія правакатары», – узгадвае Ігар.
14 траўня свае сведчанні на судзе супраць Ігара Шчамялёва далі тры міліцыянты. Супрацоўнік ДАІ Артур Цярэшчанка выступаў у якасці сведкі амаль на ўсіх судах над удзельнікамі сустрэчы аўтадому 5 траўня на Віцебскім праспекце. Не стаў выключэннем і Ігар Шчамялёў, яго інспектар ДАІ нібыта апазнаў у натоўпе і нават запомніў, у чым ён быў апрануты. Хаця бацька Ігара Міхась Шчамялёў заявіў, што гэты сведка, як толькі з’явіўся ў судзе, паказаў на Ігара і спытаў у сваіх калег, ці «гэта ён ці не».
І тым не менш, на судзе Артур Цярэшчанка сказаў упэўненае «так», пацвердзіўшы прысутнасць Ігара Шчамялёва на акцыі. Тая ж самая сітуацыя паўтарылася і з двума другімі сведкамі з боку міліцыі. На пытанне Ігара, ці дапускаеце, што вы маглі памыліцца, усе яны адказалі адмоўна.
Прыйшоў час праглядаць відэазапіс, які маецца ў справе Ігара Шчамялёва ў якасці доказаў ягонай вінаватасці. Відэа вельмі добрай якасці, зробленае аператыўнікамі падчас правядзення сустрэчы блогераў з жыхарамі Магілёва ля ГЦ «Гіпа». На відэа сведкі ўказалі на лысага мужчыну з барадой і назвалі яго Ігарам Шчамялёвым.
«Дык гэта ж нейкі стары мужык, а Ігар – малады хлопец», – абурыліся прысутныя ў залі суда.
Ігар таксама заўважыў, што на відэа мужчына без павязкі на твару і таму добра бачна, што гэта зусім іншы чалавек.
«Ну што цяпер скажаце?» – задала пытанне сведкам суддзя Жанна Пушкіна.
І цішыня. Усе трое супрацоўнікаў праваахоўных органаў не ведалі, што ім адказаць. Пасля паўторнага прагляду і доўгага абмеркавання Ігар яшчэ раз перапытаў усіх трох сведкаў, ці ўпэўненыя яны зараз, што там быў менавіта ён. І атрымаў адказ ад праваахоўнікаў, што цяпер яны ўжо не могуць казаць упэўнена, што на акцыі прысутнічаў менавіта Ігар Шчамялёў.
Ігар Шчамялёў заявіў хадайніцтва, каб суддзя запрасіла білінг яго мабільнага тэлефону 5 траўня ў часе акцыі, каб спраўдзіць, дзе ён знаходзіўся. А таксама білінг прылады ягонага сябра, які выступаў сведкаю на судзе, каб пераканацца, што яны былі разам у той вечар.
Суддзя Жанна Пушкіна задаволіла хадайніцтва і прызначыла наступнае паседжанне па справе на 10:00 гадзін 29 траўня.
«Я думаю, што ў міліцыі быў пэўны план па колькасці затрыманых і яны выконвалі яго любым шляхам. Гэта так званая палачная сістэма. Яны паспяшаліся ў выпадку са мной і сапраўды дапусцілі памылку», – зрабіў выснову Ігар пасля суда.
Фота: «Белсат»
Вольга Васільева, Belsat.eu
