Галоўная » политика » Page 157

политика

Совет Могилевской областной организации ОГП призвал население бойкотировать “Купалье” в Александрии

Обращение Совета Могилевской областной организации ОГП к населению. Вот уже который год услужливая власть организовывает … чытаць далей

«Без разгляду па істоце». Міліцыя адмовіліся адказваць на зварот магілёўскіх журналістаў

Часова выконваючы абавязкі намесніка начальніка Ленінскага РАУС Магілёва Аляксандр Пушын паведаміў сябрам ГА “Беларуская асацыяцыя журналістаў”, што іх зварот будзе “пакінуты без разгляду па істоце”, бо магілёўскія БАЖаўцы да свайго звароту “не прадаставілі ўсталяваных дакументаў, якія пацвярджаюць свае паўнамоцтвы адстойваць правы і інтарэсы Скрабуновай А. А.”

На жаль, магілёўскі міліцэйскі кіраўнік не толькі прадэманстраваў няведанне правілаў карыстання беларускай мовай, але і не пажадаў нічога адказваць па сутнасці звароту магілёўскіх бажаўцаў.

Крыху раней Магілёўскі аблвыканкам і яго Упраўленне ўнутраных спраў напісалі магілёўскім сябрам ГА “БАЖ”, што іх звароты перакінараваныя для разгляду ў Ленінскі РАУС Магілёва. Жорсткія дзеянні супрацоўнікаў менавіта гэтага аддзела міліцыі ў дачыненні да журналісткі Аліны Скрабуновай прасілі праверыць магілёўскія БАЖаўцы.

23 траўня яны накіравалі калектыўныя звароты на адрас Магілёўскага аблвыканкама, Магілёўскага гарвыканкама і УУС аблвыканкама, у якіх выказалі свой пратэст на факт неабгрунтаванага жорсткага абыходжання з боку супрацоўнікаў праваахоўных органаў падчас затрымання Скрабуновай.

— На жаль, замест тлумачэнняў наконт супрацьпраўных паводзін супрацоўнікаў праваахоўных органаў абласныя ўлады і міліцэйскія кіраўнікі перанакіравалі нашы звароты для разгляду ў Ленінскі РАУС, супрацоўнікі якога і “адзначыліся” пры затрыманні журналісткі Аліны Скрабуновай. Зразумела, што вінаватыя не будуць самі на сябе накладваць нейкія пакаранні, таму нам даслалі адпіску, да таго ж не вельмі пісьменную. Зараз мы будзем кансультавацца з юрыдычнай службай ГА “БАЖ” і дамагацца канкрэтнага адказу на нашы звароты”, –  кажа старшыня Магілёўскай суполкі ГА “БАЖ” Барыс Вырвіч.

Барыс Вырвіч таксама параіў магілёўскім уладам і праваахоўнікам усе ж  прыслухоўвацца да пазіцыі кіраўніка краіны:

— Магчыма, Аляксандр Лукашэнка не аўтарытэт для магілёўскіх чыноўнікаў і міліцыянтаў, але хацелася б ім нагадаць яго словы: «Человек должен высказывать свое мнение. Если ты человеку рот закрыл – на кухне ты каждому рот не закроешь. И это будет совсем плохо. Плохая история. Поэтому если кто-то вам говорит, что от меня исходит то, что я кому-то хочу рот закрыть – чепуха полная».

Нагадаем, што суддзя Ленінскага райсуда Магілёва Таццяна Касцюк 29 мая пакарала штрафамі “за незаконны выраб прадукцыі СМІ для замежнага спадарожнікавага тэлеканала “Белсат” магілёўскіх журналістаў Аліну Скрабунову і Яўгена Глушкова.

Крыніца: baj.by

 

 

Новы кіраўнік БРСМ — былы магілёвец, які жыве з жонкай і сынам у інтэрнаце

Як стала вядома «Нашай Ніве», цягам 43-га з’езда БРСМ вызначана кандыдатура пераемніка Андрэя Белякова на пасадзе першага сакратара арганізацыі.

Новы кіраўнік БРСМ — 31-гадовы Дзмітрый Варанюк, які дагэтуль узначальваў Мінскі абласны камітэт арганізацыі.

Дзмітрый Варанюк, фота з сацсетак

Што яшчэ пра яго вядома?

Нарадзіўся Варанюк ва ўзбекскім Ташкенце, але гадаваўся ў Магілёве, гадоў з 10 таму страціў бацьку.

Вучыўся ў Магілёўскім універсітэце імя Куляшова на географа, потым паступіў у Акадэмію кіравання.

У БРСМ Варанюк ад 2010 года.

Кар’еру пачаў з кіравання аддзяленнем арганізацыі ў МДУ імя Куляшова, потым узначальваў Ленінскі раённы камітэт БРСМ у Магілёве, потым Магілёўскі абласны камітэт БРСМ, адкуль перайшоў у ЦК БРСМ, потым — у Мінскі абласны камітэт.

Вядома, што ў Варанюка ёсць жонка і малы сын, сям’я жыве ў інтэрнаце.

Старонка Варанюка УКантакце выдае ў ім фаната турынскага «Ювентуса».

Крыніца:“Наша ніва”

Суд Ленінскага раёна Магілёва пакараў журналістаў вялікімі штрафамі

Суддзя Ленінскага райсуда Магілёва Таццяна Касцюк 29 мая пакарала штрафамі “за незаконны выраб прадукцыі СМІ для замежнага спадарожнікавага тэлеканала “Белсат” магілёўскіх журналістаў Аліну Скрабунову і Яўгена Глушкова.

Аліна Скрабунова і Яўген Глушкоў

На падставе ч. 2 арт. 22.9 КаАП на Аліну Скрабунову накладзены штраф у памеры 50 базавых велічынь. Яўген Глушкоў аштрафаны на 30 базавых велічын.

У судзе журналістам ставіўся ў віну выраб двух відэасюжэтаў для тэлеканала “Белсат” — пра высяленне жыхароў дамоў у Магілёве з-за памылкі ўладаў, і пра самагубства кіраўніка аграхолдынга “Купалаўскае” ў Шклоўскім раёне.

Пасля таго, як суддзя адмовілася выслухаць хадайніцтва Аліны Скрабуновай аб дазволе фота- і відэаздымкаў працэсу, абвінавачаныя журналісты пакінулі залу судовага пасяджэння. Разам з імі сыйшлі ўсе, хто прыйшоў падтрымаць Скрабунову і Глушкова, — сябры з ГА “БАЖ”, а таксама людзі, пра якіх журналісты рабілі рэпартажы.

“Таццяна Касцюк выконвае палітычны заказ, бо ведаюць, што яна прыме патрэбнае рашэнне. Яна не хацела задавальняць усе нашы хадайніцтвы, не захацела нават іх слухаць. Учора яна мне не хацела даваць справу на азнаямленне. Сёння ж заявіла, што не памятае, што выносіла мне абвінаваўчы вырак. Навошта прысутнічаць на працэсе, калі ўсё загадзя вырашана”, – зазначыла Аліна Скрабунова ў гутарцы з карэспандэнтам службы маніторынгу ГА “БАЖ”.

Нагадаем, у лістападзе 2017 года суддзя Таццяна Касцюк ужо карала Аліну Скрабунову штрафам у памеры 30 базавых велічынь паводле ч. 2 арт. 22.9 КаАП.

Гэта стала падставай для таго, што на судовым слуханні 29 мая 2018 года Аліна Скрабунова і Яўген Глушкоў заявілі адвод суддзі Касцюк. На думку журналістаў, паколькі суддзя прызнала віну Аліны Скрабуновай у лістападзе мінулага года, тое ж самае яна зробіць і цяпер, нягледзячы на ўсе іх довады і аргументы. Журналісты патлумачылі недавер суду тым, што суддзя Касцюк зацікаўленая ў абвінаваўчым выраку, паколькі апраўдальны будзе супярэчыць ранейшаму яе рашэнню.

Таццяна Касцюк не задаволіла хадайніцтвы журналістаў, падкрэсліўшы пры гэтым, што яна не мае нейкай асабістай зацікаўленасці пры разглядзе адміністрацыйнай справы.

Калі ўдзельнікі працэсу выйшлі на вуліцу, высветлілася, што іх таемна здымаюць з мікрааўтобуса невядомыя людзі ў цывільным.  Яны не захацелі патлумачыць, якое выданне ці ўстанову прадстаўляюць.

Па словах Скрабуновай і Глушкова, яны абавязкова будуць абскарджваць пастанову суддзі Касцюк у Магілёўскім абласным судзе.

Праваабаронца Барыс Бухель лічыць, што адміністрацыйная справа ў дачыненні журналістаў Аліны Скрабуновай і Яўгена Глушкова палітычна матываваная. Праваабаронца звязвае ціск на магілёўскіх журналістаў з агульнай хваляй рэпрэсій у Беларусі супраць тых, каго падазраюць у супрацы з тэлеканалам “Белсат”. Такога ж меркавання прытрымліваюцца і магілёўскія сябры ГА “БАЖ”.

Таксама Барыс Бухель адзначыў, што ў вынесенай суддзёй Касцюк пастанове ёсць шэраг недарэчнасцей:

“У пастанове суда Ленінскага раёна Магілёва ад 29 мая гаворыцца аб прыцягненні да адміністрацыйнай адказнасці Скрабуновай і Глушкова ўжо за выраб прадукцыі замежнага СМІ, а не за ўдзел у вырабе, як гэта паказана ў адміністрацыйных пратаколах. Гэта значыць, што суддзя Таццяна Касцюк зноў незаконна выйшла за межы адміністрацыйнага пратакола і тым самым фактычна пацвердзіла абгрунтаванасць заяўленых ёй адводаў – яна за супрацоўнікаў міліцыі зрабіла іх працу.

Акрамя таго ў апісальнай частцы пастановы ў дачыненні да абодвух фігурантаў пазначана, што яны працавалі разам над аднымі і тымі ж відэасюжэтамі, а ў высновах ўжо паказана, што кожны з фігурантаў справы самастойна, без удзелу другога ў адзін і той жа час вырабіў адну і тую ж прадукцыю замежнага СМІ. Напрошваецца лагічнае ўдакладняючае пытанне да суддзі Касцюк: “Хто ж усё-такі вырабіў гэтую прадукцыю “Белсата” – Скрабунова альбо Глушкоў?”

Крыніца: baj.by

 

У Магілёве выдатніку каледжу прыгразілі адлічэньнем: «Мусіць выйсьці з Моладзі БНФ»

Сябру Моладзі БНФ з Магілёва Аляксандру Маскалёву пагражаюць адлічэньнем з Сацыяльна-гуманітарнага каледжу. Па словах 18-гадовага хлопца, куратарка курсу ўжо размаўляла зь ім пра пэрспэктывы навучаньня, калі ён застанецца ў шэрагах моладзевай арганізацыі БНФ.

Аляксандар Маскалёў. Фота Радыё Свабода

У каледжы «занепакоеныя будучыняй» навучэнца

На гутарку выклікалі і ягоных бацькоў, якім дырэктарка Алена Кравец і яе намесьніца Валянціна Шунаева выказалі «занепакоенасьць будучыняй» навучэнца, зьвязаўшы гэта зь сяброўствам у апазыцыйнай арганізацыі.

Бацькі Аляксандра гутарку з кіраўніцтвам навучальнай установы ўспрымаюць сур’ёзна. Калі зьявіцца жаданьне, кажуць яны, адлічыць сына з каледжу, то прычыну знойдуць. Гэта, паводле іх, дала зразумець дырэктарка навучальнай установы.

«Яна сказала, што выключаць Аляксандра празь ягонае сяброўства ў апазыцыйнай арганізацыі ніхто ня мае права, але калі будуць праблемы з навучаньнем, то гэта ўжо падстава для адлічэньня», — пераказаў словы кіраўніцы каледжу бацька навучэнца Ўладзімер.

«Ня выйдзеш з апазыцыйнай арганізацыі — будуць праблемы»

Аляксандар у каледжы не хаваў, што ўступіў у моладзевую арганізацыю БНФ. На ягонай старонцы ў сацыяльных сетках ён публікаваў матэрыялы пра гэтую арганізацыю. Па яго словах, праблемы пачаліся, калі пра свае палітычныя прыхільнасьці ён сказаў аднаму з выкладчыкаў. Неўзабаве пасьля гэтага ў каледж на гутарку выклікалі бацькоў, не патлумачыўшы, зь якой нагоды. Высьветліць гэта яны папрасілі сына.

«На маё пытаньне, чаму выклікаюць бацькоў, куратарка адказала, што я мушу выйсьці з апазыцыйнай арганізацыі, інакш будуць праблемы і мяне адлічаць з каледжу», — кажа Аляксандар.

Прадстаўніца адміністрацыі: «Была гутарка з бацькамі пра захапленьні і погляды навучэнца. Пра адлічэньне не гаварылі»

Аляксандар — сярод найлепшых навучэнцаў у каледжы. Ён актыўна ўдзельнічае ў грамадзкім жыцьці навучальнай установы. Сканчае трэці курс. Вывучае інфарматыку.

Намесьніца дырэктара па выхаваўчай працы Валянціна Шунаева пытаньню аб пагрозе адлічэньня Аляксандра Маскалёва з каледжу зьдзівілася.

«Адкуль зьявілася такая тэма для абмеркаваньня, ды яшчэ пра адлічэньне навучэнца, які вучыцца цудоўна? — сказала яна. — Была толькі гутарка з бацькамі пра тое, чым ён захапляецца і якія ў яго погляды. Я нават гэта не хачу камэнтаваць».

Кастусёву паабяцалі разабрацца ў сытуацыі

Каб прадухіліць адлічэньне Аляксандра, з дырэктаркай навучальнай установы Аленай Кравец 29 траўня сустрэўся старшыня партыі БНФ Рыгор Кастусёў. Па словах партыйца, кіраўніца каледжу запэўніла яго, што разьбярэцца ў сытуацыі і на наступнай сустрэчы паінфармуе яго пра вынікі.

«Я давёў спадарыні Кравец, што сытуацыя з Аляксандрам падрывае аўтарытэт Беларусі ў Балёнскім працэсе», — сказаў Свабодзе Рыгор Кастусёў, як толькі выйшаў з каледжу.

«Таксама сказаў ёй, што паведамлю пра пагрозы адлічэньня навучэнца, сябра моладзі БНФ у Міністэрства адукацыі, бо перасьлед празь ягоныя палітычныя прыхільнасьці недапушчальны. Зразумела, калі будзе прымацца рашэньне аб яго адлічэньні, то зацьвярджаць яго будзе Алена Кравец, і яна ня здолее пратэставаць», — сказаў кіраўнік партыі БНФ.

Аляксандар Маскалёў не зьбіраецца сыходзіць з Моладзі БНФ. Кажа, што Канстытуцыя дае яму права самому вырашаць, да якой арганізацыі далучацца. Дзейнасьць Моладзі БНФ, кажа ён, не парушае беларускага заканадаўства.

Крыніца: Радыё Свабода

Магілёўскія ўлады забаранілі пікет у падтрымку прафсаюзных лідараў

Прававы інспектар незалежнага прафсаюзу радыёэлектроннай прамысловасці ў Магілёве Аляксей Яўгенаў лічыць гэта паказчыкам таго, што … чытаць далей

Суд над магілёўскімі журналістамі адбудзецца 29 мая

Разгляд адміністрацыйнай справы ў дачыненні да магілёўскіх журналістаў-фрылансераў Аліны Скрабуновай і Яўгена Глушкова адбудзецца ў судзе Ленінскага раёна горада Магілёва ў 10 гадзін раніцы 29 мая.

Аліна Скрабунова, Барыс Бухель і Яўген Глушкоў

Журналістаў абвінавачваюць у незаконным вырабе прадукцыі СМІ для спадарожнікавага тэлеканала “Белсат” (ч.2 арт. 22.9 КаАП).

Старэйшы ўчастковы інспектар Ленінскага РАУС г. Магілёва маёр Руслан Марозаў 23 мая склаў на журналістаў пратаколы аб адміністрацыйным правапарушэнні за відэасюжэт пра высяленне жыхароў дамоў у Магілёве, які быў паказаны ў эфіры тэлеканала “Белсат”.

25 мая Яўгену Глушкову патэлефанавалі з Ленінскага райсуда Магілёва і паведамілі, што 29 мая яго чакае суд за незаконны выраб прадукцыі СМІ, пазней даслалі афіцыйную позву. Атрымала адпаведнае паведамленне на тэлефонны нумар і Аліна Скрабунова.

Неабходна адзначыць, што ўжо бліжэйшым часам фрылансераў можа чакаць яшчэ адзін суд за незаконны выраб прадукцыі СМІ — ужо ў Шклоўскім раёне. 25 мая намеснік начальніка аддзялення аховы правапарадку і прафілактыкі Шклоўскага РАУС капітан Віталь Бугаеў склаў пратакол аб адміністрацыйным правапарушэнні на журналістку Аліну Скрабунову за паказаны на “Белсаце” відэасюжэт пра самагубства кіраўніка аграхолдынга “Купалаўскае” Дзмітрыя Васілеўскага. 23 мая аналагічны пратакол быў складзены ім у дачыненні журналіста Яўгена Глушкова.

Крыніца: baj.by

 

Рыгор Кастусёў: «Для некаторых палітыкаў юбілей БНР быў проста пляцоўкай для рэалізацыі дробязных амбіцыяў»

На плечы лідара БНФ у плане падрыхтоўкі Свята незалежнасці 25 сакавіка выпала не самая простая задача: перамовы з чыноўнікамі, часам, вельмі высокага рангу. Для кагосьці гэта «здрада», для іншых — канструктыўная праца. Як праходзілі перамовы, што атрымалася, а што не?

Рыгор Кастусёў на з’ездзе БНФ

Ці ўсё з задуманага і дамоўленага па адзначэнні 25 сакавіка атрымала ход? Ці ёсць беларускае чынавецтва адзіным маналітам альбо гэта людзі розных поглядаў, як неакамуністычных, так і нацыянальных? Распавядае лідар Партыі БНФ Рыгор Кастусёў.
Ад Савету Міністраў да “Звязды”
Аргкамітэт па святкаванні 100-годдзя БНР пачаў працу яшчэ на мяжы 2016-2017 гадоў. У лістападзе ад імя аргкамітэту я пачаў абыход уладных кабінетаў з прапановамі па 100-годдзі БНР: ад МЗС і Савета міністраў да Мінгарвыканкаму і газеты «Звязда». Стаўленне было рознае, але ў цэлым на тым баку многія асэнсавалі, што без нацыянальнага фундаменту краіна не можа трывала стаяць. Гэта адкрывала акно магчымасцяў, якія нельга было ўпусціць.
Наш праект святкавання даты змясціўся на сямі аркушах. Першым саюзнікам стала стала Акадэмія навук. Менавіта яе пазітыўнае заключэнне дало зялёнае святло разнастайным ініцыятывам і стала сігналам для іншых дзяржаўных установаў.
Пра рознае чынавецтва
Некаторыя дзеянні дзяржаўных службоўцаў па адзначэнні юбілею могуць выклікаць усмешку — сістэму ўлады ў Беларусі юбілей БНР памяняць не мог. Напрыклад, у Карэлічах лекцыю па гісторыі БНР чытала тамтэйшая актывістка кампартыі. Але больш важна, што яна была вымушаная гэтую лекцыю чытаць паводле рэкамендацыі аблвыканкама, разасланай па ўсіх ўстановах культуры Гарадзеншчыны.
Чыноўнікі розныя: хтосьці мае прагматычнае разуменне, што без незалежнасці горш будзе ўсім, дзесьці ёсць шчыры патрыятызм, дзесьці будуць выконваць усё тое, што спушчана зверху. Каля траціны нашых прапановаў атрымала ход і падтрымку. Чынавенства — гэта не маналіт, там можна знайсці цалкам розных людзей, з якімі можна і варта працаваць.

Падчас круглага сталу ў газеце «Звязда»

 

Пра Якубовіча і Сярэдзіча
Прапанаваны ўладам план мерапрыемстваў да 100-годдзя БНР мы дасылалі і ў «Савецкую Беларусь» і ў «Народную Волю». Праігнаравала зварот толькі апошняя! У выніку для чытача гэтай газеты дзеянні ўладаў напярэдадні 25 сакавіка выглядалі нейкай раптоўнай і хітрамудрай камбінацыяй, хоць насамрэч яны проста ішлі насустрач нашым прапановам.
Пра АртСядзібу і блогераў
Пасля нашых зваротаў у адміністрацыю прайшлі перамовы з Мінгарвыканкамам. Былі атрыманыя неафіцыйныя, але прагматычныя прапановы пра магчымы фармат святкавання 25 сакавіка ў Мінску. Падкрэслю, што для нас акцыя ў сталіцы была толькі часткай планаў па адзначэнні 100-годдзя БНР. Атрыманыя прапановы я агучыў на паседжанні аргкаміэту, што стаў вядомы дзякуючы відэастрыму, і пасля якога мы аб’ядналі высілкі з АртСядзібай і супольнасцю блогераў. Гэтыя людзі мелі распрацаваны план свята незалежнасці, але ўлады не давалі ім дазволу. У нас жа атрымалася дамагчыся пазітыўнага рашэння на палітычным узроўні. Пасля гэтага і тэхнічныя пытанні вырашаліся прасцей.

Паседжанне аргкамітэту па святкаванні 100-годдзя БНР

Пра канцэрт і пратэст
Аргкамітэтам 100-годдзя БНР быў абраны фармат: Свята Незалежнасці. Але асобныя сябры аргкаму ўсё адно бачылі 25 сакавіка толькі як чарговую нагоду да пратэсту. Зразумела, мы адхілілі гэта: для Беларусі важней далучыць дзясяткі тысячаў новых людзей праз канцэрт, чым проста дзясяткі вывесці на пратэст, якіх было і будзе яшчэ шмат. Шкада, што для некаторых палітыкаў вялікі юбілей быў проста пляцоўкай для рэалізацыі сваіх амбіцыяў, прычым вельмі дробязных.
Пра дзве скасаваныя заяўкі на шэсце
Намі былі пададзеныя заяўкі на мітынг-канцэрт і шэсце ад скверу Купалы да Опернага, каб людзі паспелі на пачатак свята. Усё ішло да таго, што Мінгарвыканкам дазволіць і шэсце, і канцэрт, прынамсі, так вынікала з перамоваў. Але раптам мы дазнаемся, што сябры БНК падалі заяўку на сваё шэсце ад плошчы Якуба Коласа да Оперы, заявіўшы, што будуць арганізоўваць шэсце нават у несанкцыянаваным фармаце. Пасля гэтага ўлады скасавалі абедзве заяўкі на шэсце, а шмат якія ініцыятывы, пра якія ўжо існавала дамоўленасць, былі замарожаныя.

Ігар Марзалюк і Рыгор Кастусёў на адкрыцці выставы, прысвечанай БНР, у Нацыянальным музеі

 

Пра дзве тактыкі вырашэння пытання
Мой падыход такі: ёсць два варыянты вырашэння пытання, дзве тактыкі. Першая – гэта стаць у позу, паўтарыць сто разоў ужо гаворанае пра «крывавы рэжым», зрабіць усё як заўсёды, ды сесці на суткі ці атрымаць штраф. А плён які? Другі варыянт – гэта разабрацца, якія магчымасці адкрытыя менавіта цяпер, якія ёсць шансы, і не ўпусціць іх. Калі патрэбны вынік, дык трэба працаваць, а не займацца самарэкламай.
Пра тое, што не атрымалася
Агулам да 100-годдзя незалежнасці была рэалізаваная прыкладна траціна ад нашых прапановаў. Што не атрымалася? Мы б хацелі, каб вуліца Валадарскага займела імя братоў Луцкевічаў. Хацелі, каб МЗС правяло прыёмы, прысвечаныя 25-му сакавіка ў сваіх амбасадах за мяжой, а таксама ўшанавала памяць БНР у тых месцаў, дзе ў 1918-20-м працавалі беларускія дыпламатычныя місіі… Але, мабыць, не ўсё адразу.
Пра карцінку ў замежных СМІ
Агульны вынік неблагі, асабліва ў параўнанні з той роспаччу і паняверкай, якая апанавала незалежніцкія колы пасля 25 сакавіка 2017 году. Нашая задача была — не дапусіць, каб пра стагоддзе беларускай незалежнасці свет даведаўся з навінаў пра чарговае задушэнне пратэстаў на вуліцах Мінска. Свята адбылося, і адбылося годна. Але, нажаль, у замежных СМІ карцінка з Мінску была звычайная — хапун, арышты, збіццё… Гэта тое, што не атрымалася: унутры Беларусі Свята Незалежнасці сталася самай маштабнай акцыяй патрыётаў, але навонкі пайшоў зусім іншы мэсыдж.

Мемарыяльная шыльда, якая гадамі стаяла на офісе партыі БНФ

Пра памятную шыльду БНР на Валадарскага
З шыльдай сітуацыя наступная: 23 сакавіка яна мелася быць усталяваная. Але ўрачыстае адкрыццё шыльды – гэта масавае мерапрыемства, гэты момант мы не паспелі ўзгадніць. У СМІ раней часу пайшла інфармацыя пра дату адкрыцця, і гэта стала фармальнай нагодай для таго каб улады затармазілі працэс. Уключыліся і апаненты: ад прарасійскіх шавіністычных колаў у выканкам пайшлі звароты супраць усталявання… У выніку дамагчыся ад выканкама рэалізацыі раней дасягнутых палітычных дамоўленасцяў было ўжо цяжка. Станам на сёння бюракратычны бок пытання вырашаны. Мінгарвыканкам, з іхных словаў, зацікаўлены ў станоўчым вырашэнні сітуацыі. Спадзяюся, слова стрымаюць.
Пра галоўны прарыў
Галоўнае дасягненне і прарыў, на мой погляд, гэта тое, што атрымалася вывесці такі важны момант нашай гісторыі з ценю, заангажаваць у гэты працэс і грамадства, і дзяржаўныя структуры. Ужо ёсць разуменне, што БНР — гэта ўласнабеларускі праект, лёсавызначальны, і важны для нашай будучыні. Гэта было сапраўды народнае свята, яго рабілі палітыкі, грамадскія актывісты, блогеры, арганізатары выставаў, бровары, што варылі адмысловае піва да юбілею. І прынцыпова важна — улады перасталі дэклараваць варожае стаўленне да гэтай даты.

Алесь Кіркевіч

Крыніца: “Новы час”

 

Отчетно-выборная конференция Могилевской областной организации ОГП состоится 27 мая

Дан старт отчетно-выборной кампании в Объединенной гражданской партии, кульминацией которой станет Съезд партии. В соответствии … чытаць далей