россотрудничество

З дапамогай дзіцячых конкурсаў “Рассупрацоўніцтва” набірае сабе прарасейскіх валантэраў. Праца вядзецца сістэмна праз грамадскае аб’яднанне “Наследие”.

Магілёўскі рэгіянальны этап міжнароднага конкурса дэкламатараў “Жывая класіка” скончыўся. Будуць адабраныя ўсяго тры фіналісты, якія паедуць у Мінск для ўдзелу ў нацыянальным спаборніцтве. Толькі адбудзецца яно ў спецыфічным месцы – Доме Масквы ў беларускай сталіцы.

Партнёрам магілёўскага рэгіянальнага этапа выступіла “Рассупрацоўніцтва” – расейскі цэнтр навукі і культуры, які з’яўляецца прадстаўніцтвам Федэральнай агенцыі па справах СНД, суайчыннікаў па-за межамі Расеі і міжнароднаму гуманітарнаму супрацоўніцтву. Конкурс быў абвешчаны прарасейскай магілёўскай грамадскай арганізацыяй “Наследие”, якая даўна атабарылася ў Беларуска-расейскім універсітытэце. Атмасферу мерапрыемтсва можа перадаць вось гэтае фота:

Згодна з правіламі, удзел у конкурсе могуць прымаць асобы ва ўзросце ад 10 да 17 гадоў. Конкурс праводзіцца толькі на расейскай мове. Сярод задачаў конкурса пазначаныя “падтрымка і папулярызацыя расейскай мовы за мяжой”, “падтрымка інтарэса да расейскай мовы сярод дзяцей у білінгвальных сем’ях”. Кіраўніцтва арганізацыяй правядзення конкурса ажыццяўляе аргкамітэт, які акрамя “Рассупрацоўніцтва” фармуецца яшчэ з прадстаўнікоў Міністэрства асветы РФ, Расдрука, фонда “Русский мир”.

На Магілёўшчыне свае конкурсныя праграмы прадставілі 32 навучэнкі і навучэнцы. З іх і былі адабраныя тры найлепшыя. Цікава, што конкурс быў праведзены акурат праз тыдзень, як скончыўся раённы конкурс даследніцкіх працаў для вучняў 10-х класаў “Прававы навігатар” пад эгідай VI магілёўскага фестываля навукі, пра які мала хто чуў. Усе ўдзельнікі таксама атрымалі дыпломы “Рассупрацоўніцтва”. Пра гэта само “Рассупрацоўніцтва” і паведаміла:

Але і гэта яшчэ не ўсё. Без аніякай рэкламы тры дні таму ў Магілёве ціхенька прайшоў яшчэ і конкурс памяці паэта Сяргея Ясеніна. Зноў жа на базе БРУ, а арганізатар – “Рассупрацоўніцтва”. Перад студэнтамі выступілі кіраўнік міжнароднага грамадскага аб’яднання “Русь Единая” Міхаіл Ткачоў і прадстаўніца Расейскага цэнтра навукі і культуры Наталля Макурава – жонка расейскага дыпламата Леаніда Макурава, які доўгі час займаўся развіццём казацкіх арганізацыяў у Расеі, а цяпер працуе у амбасадзе ў Мінску.

Такім чынам, штотыдзень у Магілёве пры падтрымцы “Рассупрацоўніцтва” праводзяцца розныя імпрэзы, накіраваныя на самых маладых таленавітых вучняў. Не паспявае скончыцца адзін конкурс, як абвяшчаецца новы. Так рыхтуецца рэзерв прарасейскіх патрыётаў.

Фота: vk.com/naslediem

Аляксандр Весялоўскі