Плануецца, што святочны фэст у Бялынічах пройдзе з удзелам усяго беларускага каталіцкага епіскапату. Хутчэй за ўсё, прыме ўдзел у фэсце і новапрызначаны арцыбіскуп Мітрапаліт Мінска-Магілёўскі Юзаф Станеўскі.
17–18 верасня ў Бялынічах на Магілёўшчыне пройдуць агульнабеларускія ўрачыстасці ў гонар 260-й гадавіны каранацыі папскімі каронамі цудадзейнага абраза Маці Божай Бялыніцкай. Гэта важная падзея адбылася 20 верасня 1761 года.
Таксама на фэсце адзначаць 30-годдзе ўтварэння Мінска-Магілёўскай Мітраполіі і адраджэння структур Каталіцкага Касцёла ў Беларусі.
У межах урачыстасці плануецца правесці тэматычную канферэнцю, а таксама шэраг набажэнстваў і цэлебрацый з удзелам вернікаў і іерархаў Касцёла ў Беларусі. Тэматычная канферэнцыя адбудзецца 17 верасня ў малой зале Бялыніцкага раённага цэнтра культуры.
Урачыстасці ў Бялынічах пройдуць пад дэвізам «Каралева Беларусі, маліся за нас».
Праграма ўрачыстасцяў
- 17 верасня, пятніца
14.00 – канферэнцыя ў Раённым цэнтры культуры (Бялынічы, вул. Савецкая, 20)
Даклады:
- «Адраджэнне іерархічных структур Каталіцкага Касцёла на Беларусі» — арцыбіскуп Тадэвуш Кандрусевіч
- «Марыйны культ у Беларусі» — ксёндз доктар Уладзімір Гуляй (Ліда)
- «Дзейнасць ордэна кармелітаў у Бялынічах» — айцец Юрый Кулай OCD
- «Культ Маці Божай Бялыніцкай і каранацыя абраза» — прафесар Зміцер Яцкевіч
16.00 – перапынак на каву
16.30 – канцэрт харавых калектываў
18.00 – святая Імша (у капліцы, вул. Калініна, 37)
- 18 верасня, субота
10.00 – гістарычная экскурсія для ахвотных «Бялынічы пасярод Усходу і Захаду»
12.00 – галоўная адпустовая святая Імша (на палявым алтары на месцы даўніх каталіцкіх могілак на скрыжаванні вуліц Ленінскай і Мічурына)
Ілона Бегановіч