Палітзьняволены Павал Севярынец пераведены ў магілёўскую турму № 4, дзе будзе чакаць суду. Пра гэта паведаміла ягоная жонка Вольга Севярынец.
Раней стала вядома, што разам зь ім у Магілёўскім абласным судзе будуць судзіць актывістаў Яўгена Афнагеля, Андрэя Войніча, Паўла Юхневіча, Максіма Вінярскага, Дзьмітрыя Казлова, Ірыну Шчасную. Паводле наяўных зьвестак, яны ўжо ў абласным цэнтры.
Дата пачатку разгляду справы яшчэ не прызначаная.
Да таго ў Магілёве асудзілі берасьцейскіх блогераў Аляксандра Кабанава і Сяргея Пятрухіна — абодва пакараныя 3 гадамі зьняволеньня ў калёніі агульнага рэжыму, а таксама мусяць сплаціць па 750 рублёў кампэнсацыі маральнай шкоды «зьняважанаму» амапаўцу Віталю Аўтушэнку.
Чаму менавіта Магілёў абраны месцам для працэсаў, асабліва з улікам таго, што ўсе падсудныя іншагародныя — не ўдакладняецца. Аднак, як лічаць сваякі фігурантаў, збольшага дзеля таго, каб ускладніць перасоўваньне родным, праваабаронцам і журналістам.
Фота: Радыё Свабода
Крыніца: Радыё Свабода