15 мая суд Кастрычніцкага раёна Магілёва пакараў актывіста Васіля Курушына 7 суткамі адміністрацыйнага арышту. Пра гэта паведаміў “Магілёўскаму рэгіёну” праваабаронца Барыс Бухель.
Васіля Курушына затрымалі 14 мая, калі ён збіраўся ехаць у Мінск, каб прыняць удзел у акцыі, якую планаваў зрабіць Мікалай Статкевіч. В.Курушын – актывіст БСДП “Народная грамада”, якую ўзначальвае М. Статкевіч.
Актывіста абвінавацілі ва ўдзеле ў несанкцыянаванай акцыі 5 мая ў Магілёве, звязанай з прыездам у горад каманды блогера С.Ціханоўскага “Краіна для жыцця”.
15 мая суддзя суда Кастрычніцкага раёна Магілёва Жанна Пушкіна прызнала яго вінаватым па артыкуле 23.34 КаАП і пакарала Васіля Курушына 7 суткамі арышту.
Згодна інфармацыі праваабаронцаў, па стане на 13 мая, з 6 мая ў Беларусі:
- былі затрыманыя каля 120 чалавек: удзельнікаў мірных сходаў, праваабаронцаў і журналістаў;
- міліцыя склала прыкладна столькі ж пратаколаў (каля 120) за парушэнне заканадаўства аб масавых мерапрыемствах (арт. 23.34 КаАП);
- 50 чалавек асуджаныя на арышты тэрмінам ад 2 да 25 сутак. Агульная колькасць атрыманых сутак з 6 па 13 траўня — 479;
- 20 чалавек атрымалі штрафы на агульную суму ў 583 базавыя велічыні (15741 рубель);
- адміністрацыйныя суды прайшлі ў 17 гарадах краіны, сярод якіх Мінск, Віцебск, Гомель, Бабруйск, Магілёў, Орша, Паставы, Полацк, Наваполацк, Глыбокае, Вілейка, Гродна, Ліда, Брэст, Мазыр, Жлобін, Мар’іна Горка.
Фота: «Белсат»
Сяргей Семяновіч