Для ваеннаслужачых 336 рэактыўнай артылерыйскай брыгады паездкі на значныя адлегласці і замежныя палігоны — справа звыклая. Вось і днямі падраздзяленні рэактыўшчыкаў і 465 ракетнай брыгады зноў “на чамаданах”…
Сумесныя вучэнні з баявымі пускамі ракетных войск і артылерыі Казахстана і Беларусі плануецца правесці ў пачатку мая. Каб трапіць у кропку прызначэння, асіпаўчанам патрэбен дзесьці тыдзень на дарогу ў адзін бок. Але ехаць ёсць дзеля чаго: палігон у раёне возера Балхаш значна перавышае наш па памерах і дазваляе без перашкод выкарыстоўваць на ўсю моц гонар беларускага ваенпрама РСЗА “Паланез” і правераныя часам ракетныя комплексы “Точка”.
У своеасаблівае падарожжа асабовы склад і тэхніка адправіліся па чыгунцы. Пагрузка баявых машын заняла каля сутак, і перад адпраўкай парады і пажаданні ракетчыкам і рэактыўшчыкам выказаў камандзір 336 рэабр палкоўнік Аляксандр Цішкевіч. Усе прайшлі адпаведны інструктаж, атрымалі апошнія інструкцыі. Завітаў да ваенных і настаяцель Крыжа-Уздзвіжанскага храма протаіерэй Аляксандр Кісялёў, які па традыцыі блаславіў армейцаў на ратныя подзвігі.
Марыя ТАЛЕЙКА. Фота аўтара
Крыніца: “Асіповіцкі край”