Гледзячы па ўсім, Лукашэнка прыйшоў да высновы, што атрымлівае перамогу над пратэстуючым народам. А калі так, то прыйшоў час расплаты. Цяпер можна пачаць помсьціць усім, хто супраць, з-за каго кіроўны рэжым перажыў непрыхаваны страх.
З кожным разам колькасьць затрыманых падчас акцый павялічваецца. Супрацоўнікі МУС вярнуліся да ўжываньня спэцсродкаў (вадаметы і інш.), якія выкарыстоўваліся ў першыя трое сутак жорсткага падаўленьня пратэсту пасьля выбараў.
Пачаліся чысткі дзяржапарата.
Адбываецца помста усім людзям, якія працавалі ў дзяржустановах, але потым сыйшлі адтуль у знак пратэсту (журналісты Дзьмітрый Семчанка, Дзяніс Дудзінскі, Дзьмітрый Кахно і шмат іншых людзей).
Вядомыя спартоўцы, трэнеры звальняюцца з працы, пазбаўляюцца спартовых стыпэндый і інш.
Адбываецца перасьлед адвакатаў, занятых у гучных палітычных справах.
Пачалі помсьціць ініцыятарам страйкаў на прадпрыемствах.
Пачалася зачыстка мэдыяў. Адбываецца відавочны “наезд” на TUT.BY і “Нашу ніву”. На ўсіх акцыях мэтанакіравана затрымліваюць журналістаў.
Паводле праваабаронцаў, з 9 жніўня у Беларусі затрымана каля 12 тыс чалавек. Гэта ўжо не проста “паліцэйская дзяржава”. Краіна на вачах ператвараецца ў адзін вялікі канцлягер.
Валерый Карбалевіч